Hoppa yfir valmynd

Heimsmarkmiðasjóður atvinnulífs

Heimsmarkmiðasjóður atvinnulífsins styrkir verkefni íslenskra fyrirtækja til að draga úr fátækt og styðja við atvinnusköpun og sjálfbæran vöxt í þróunarlöndum. Sérstök áhersla er lögð á atvinnusköpun kvenna og að verkefnin hafi jákvæð umhverfisáhrif. Grundvallaratriði er að verkefnin styðji við Heimsmarkmiðin, einkum heimsmarkmið 8 um atvinnuþróun og atvinnusköpun.

Fjárhæð styrkja:  Fjárhæð til einstakra verkefna nemur hæst EUR 200.000 yfir þriggja ára tímabil. Styrkfjárhæð getur numið allt að 50% af heildarkostnaði verkefnis.

Lönd: Sjóðurinn veitir styrki til verkefna í fátækari þróunarríkjum og smáeyþróunarríkjum. Hér má finna lista yfir möguleg samstarfslönd

Hvenær? Opnað er fyrir umsóknir að jafnaði þrisvar á ári og birt neðst á þessari síðu. 

Fyrir hvern? Öll íslensk fyrirtæki geta sótt í sjóðinn. Fyrirtækin verða að vera opinberlega skráð og mega ekki vera ríkisaðilar.

Samstarfsaðili í þróunarlandi: Verkefni þurfa að vera unnin í samvinnu við fyrirtæki, stofnun eða stjórnvöld í þróunarlandi, þ.e. íslenska fyrirtækið verður að vera í samstarfi við fyrirtæki eða stofnun í þróunarlandinu. 

Samvinna íslenskra aðila: Íslensku fyrirtækin geta einnig unnið verkefnin í samvinnu við önnur íslensk fyrirtæki sem og háskóla og félagasamtök. Félagasamtök geta einnig sótt um styrki í gegnum Heimsmarkmiðasjóð félagasamtaka

Ertu tilbúinn? Miklu skiptir að fyrirtæki hafi reynslu og kunnáttu við framkvæmd sambærilegra verkefna, einkum í þróunarlöndum. Þá skiptir máli að sú vara eða þekking sem verkefni byggist á hafi náð þroska og að fyrirtækið sé tilbúið að taka þátt í starfsemi í fjarlægum löndum. Ef hugmynd er á frumstigi er bent á smærri styrki, Þróunarfræ, hjá Tækniþróunarsjóði

Heimasíða og umsókn:Finna má nánari upplýsingar um sjóðinn á vefsíðunni www.utn.is/samstarfssjodur og sótt er um í gegnum www.island.is/samstarfssjodur.

Tengiliður: Nánari upplýsingar um sjóðinn veitir Sigurlilja Albertsdóttir hjá utanríkisráðuneytinu. Að auki er velkomið að heyra í starfsmanni Heimstorgsins hjá Íslandsstofu um frekari leiðbeiningar.

Aðstoð: Um aðra aðstoð við undirbúning verkefna, leit að samstarfsaðila og umsókn um styrki er bent á upplýsingasíðu hér á Heimstorginu um þá sem veita slíka aðstoð. 

Staðsetning: Fullt nafn sjóðsins er "Samstarfssjóður við atvinnulíf um heimsmarkmið Sameinuðu þjóðanna" og hann er staðsettur hjá utanríkisráðuneytinu. Utanríkisráðherra úthlutar styrkjum að fengnu áliti þriggja manna matshóps sem er skipaður þremur óháðum sérfræðingum á sviði þróunarsamvinnu. 

Fyrri styrkveitingar: Sjóðurinn hefur þegar veitt styrki til íslenskra fyrirtækja og má finna upplýsingar um nokkra þeirra á þessu yfirliti. Öll eru þessi verkefni í gangi og er sérstaklega fjallað um verkefni Creditinfo í Vestur Afríku hér á Heimstorginu.